Gina-respeto sang Bacolod City Police Office (BCPO) ang desisyon ni Presidente Rodrigo Duterte nga ibutang si Vice President Leni Robredo bilang co-chair sang committee against illegal drugs sang gobyerno.
Sa interview sang Bombo Radyo Bacolod kay P/Lt. Col. Ariel Pico, spokesperson sang BCPO, iya ginpahayag nga tion na ini agud maghimo naman sang tikang ang bise presidente batok sa iligal nga druga.
Ginalantaw ni Pico nga luyag lang sang presidente nga makita kun diin kutob ang sarang mahimo ni Robredo sa pagtapna sang iligal nga druga sa pungsod.
Aminado man ang tagpamaba sang BCPO nga masakit para sa ila nga bahin nga mahambalan nga ‘failure’ ang war on drugs sang Duterte administration bangud suno sa iya wala-tuo na ang ginapatigayon nila nga mga buybust operation.
Dugang pa ni Pico, dapat magbuligay ang tanan sa pag-away sa iligal nga druga kag indi lamang ang gobyerno kag ang kapulisan ang mangin imbolbado diri.
