Ginlubong na kahapon sang hapon si Desiree Bornales, ang siyam ka tuig nga bata nga babayi nga napatay matapos ginlampusan sang bato sa Hacienda Badiang, Brgy. E. Lopez, Silay City.
Madumduman nga luwas kay Desiree, yara pa sa karun sa ospital ang duha pa sini ka utod nga apat ka tuig nga lalaki kag 14 anyos nga babayi.
Sa interview sang Bombo Radyo Bacolod kay Silay City Mayor Joedith Gallego, estable na ang kondisyon sang apat ka tuig, apang apisar na-operahan na sa ulo ang 14 anyos ini ang kritikal gihapon kag nagapabilin sa Intensive Care Unit (ICU).
Kahapon, madamo naman sang nagtambong sa lubong sang siyam ka tuig sa Silay City Public Cemetery.
Wala pa nasugilanon sang alkalde ang iloy sang biktima, bangod ini ang nangin masako sa pag-asikaso sa iya duha ka kabataan sa ospital.
Luwas sa Silay City Government, si Negros Occidental 3rd District Representative Javi Benitez ang nagabulig man sa pamilya.
Nagkomiter naman ang Overseas Workers Welfare Administration (OWWA) sa pagbulig, ilabi na nga overseas Filipino worker (OFW) ang ila iloy.
Ginahatag na sang alkalde sa kamot sang kapulisan ang pag-imbestigar kag paghatag sang hustisya sa mga kabataan.
Suno diri, may mga persons of interest na ang kapulisan.
Padayun ang panawagan ni Gallego sa may nahibaluan sa krimen nga magkooperar sa imbesigasyon, kag mahimo magdangop sa Silay City Government, kapulisan ukon sa pamilya.
Luwas sa alkalde, yara man sa lubong kahapon ang pila ka konsehal sang ciudad.
