Ginatugyan na lamang sang gobernador sang Negros Occidental sa Korte Suprema ang pagdesisyo sa petition nga gin-file agud i-deklarar ang Republic Act 12000 ukon Negros Island Region Act nga unconstitutional.
Suno kay Governor Eugenio Jose “Bong” Lacson, ang Pilipinas ang isa democratic country kag bisan sin-o ang makafile sang petition sa Korte Suprema kun luyag sang mga ini.
Suno kay Lacson, nakadepende na sa Korte Suprema ang pagdesisyon sa petition.
Ginpahayag man sini nga wala pa napirmahan ang Implementing Rules and Regulations (IRR) sang nasambit nga layi apang nagalaom ini nga mapirmahan sa labing madali nga panahon.
Suno sa gobernador, posible nga nabatyagan sang mga petitioners nga mabutang sa disbentaha ang Negros Oriental kag Siquijor sa pagtukod sang Negros Island Region, apang ginpabutyag sini nga mas madamo ang nagahambal nga makapamaayo sa tatlo ka mga probinsiya ang NIR.
Dugang pa sini, mismo sanday 5th District Congressman Dino Yulo kag 6th District Congresswoman Mercedes Alvarez ang nagpahayag nga wala sila sang ginlapas nga kasuguan sa pagpasar sang NIR Act.
Ginpahayag man ni Lacson nga indi naman sang kinahanglan nga makighinun-anon sa mga gobernador sang Oriental kag Siquijor bangud nagtambong man ang mga ini sa ginhiwat nga meeting sang NIR Technical Working Group, particular ang mag-amay nga Siquijor Governor Jake Vincent Villa kag Lone District Congressman Zaldy Villa.
