Nagpangayo sang pasaylo kag malaba nga pasensya ang pinuno sang Department of Foreign Affairs – Bacolod tuhoy sa reklamo sang mga pumuluyo nga masami nga wala sang available slot sa website sang DFA-Bacolod para sa passport renewal.
Sa interview sang Bombo Radyo kay DFA Bacolod Head Rex Albania, indi nila makontrolar ang online appointment bangud ang national office nga yara sa Manila ang nagakontrolar diri.
Suno kay Albania, wala gilayon nga ginabuksan ang releasing bangud may mga fixers nga nagabantay kag nagakuha sang appointment kag ila ini igabaligya sa mas mataas nga presyo.
Suno diri, may yara man sang courtesy lane para sa mga senior citizens, persons with disabilities kag mga menor-de-edad kasubong man ang mga returning overseas Filipino workers nga nakapauli na sa sulod sang isa ka tuig, online apang 30 lamang ka slots ang available kada adlaw.
Gindugang man sini nga sa ikaduha nga quarter sang tuig ukon sa Abril, magabukas na ang Temporary Offsite Passport Site (TOPS) sang DFA-Bacolod nga sarang nga makacater sang 300 tubtob 500 ka mga slots kada adlaw.
Aminado ini nga mabudlay mag-identify sang mga fixers gani nagapangayo ini sang pasaylo sa problema sa website kag nagpromisa nga may mga tikang sila nga pagahimuon agud ini ang maimprove.
