Indi na pagtapuson ang pag-finalize sang ginadihon nga Code of Conduct o COC sa ginaagawan nga kadagatan sa South-East Asia, kalakip na ang West Philippine Sea sa pagpanguna sang Pilipinas subong nga 49th Association of Southeast Asian Nations Summit, sa baylo ginalauman nga matapos ini sa masunod nga ASEAN summit sa Singapore sa 2027.
Sa press briefing sa International Media Center, ginpaathag ni Foreign Affairs Secretary Maria Theresa Lazaro nga may pila ka mga importante nga ginadiskusyunan nga wala pa ginkasugtan gani gintugyan na sang Pilipinas ang pag-finalize sini sa Singapore.
Nauna na nga ginpahayag sang tiglikom nga yara sa 80 percent ang natapos sa kasugtanan nga may katuyuan nga magtalana sang mga pagsulundan agud malikawan ang tensiyon kag komprontasyon sa ginaagawan nga kadagatan.
Ginpaathag ni Lazaro nga kalakip sa mga kabangdanan sang pagka-delay ang magkatuhay nga panan-awan sang napulo ka pungsod kalakip sa Asean kag China kasubong man ang mga sensitibo nga legal concerns.
Kalakip sini ang posibilidad nga kinahanglan sang pila ka pungsod nga paaprubahan ukon pabakuron pa sang ila tagsa ka mga kongreso ang nasambit nga kasugtanan.
Gin-emphasize sang tiglikom nga kun nahatagan lamang ang Pilipinas sang dugang nga lima tubtob anum ka bulan, posible nga natapos na ang kasugtanan sa idalom sang pagpamuno sini sa ASEAN summit.
Samtang, apisar nga wala na-finalize ang COC, ginpahayag ni Lazaro nga ginakabig ini sagihapon nga kadalag-an sang Pilipinas bangud sa ginabanta nga 50 percent nga progreso ang nagdangat na ini sa 80 percent sa tion sang pagpamuno sang pungsod sa ASEAN.
Suno pa sa tiglikom yara sa ulihi nga chapter na ang negosasyon sa nasambit nga kasugtanan kag ginkilala sang pungsod ang dedikasyon kag pagbuligay sang mga deligado agud madihon ini partikular na ang China kag Malaysia nga co-chair sang COC.
Kasubong man, ginhatagan man sang importansya ni Lazaro nga apisar ang duha ka pungsod ang nagserbe nga co-chair sa negosasyon, ang Pilipinas sagihapon bilang Chair sang ASEAN subong nga 2026 ang nagpanguna sa kabug-usan nga proseso agud mapadasig ang pagdihon sini.
Ang nasambit nga Code of Conduct ang importante bangud katuyuan sini nga magtalana sang mga pagsulundan sa pagsulusyon sa mga kagamo sa ginaagawan nga kadagatan sa South-East Asia, kun sa diin kalakip ang Pilipinas kag China sa mga pungsod nga nagaakon sa nasambit nga teritoryo.












