Ginpahayag sang Department of Foreign Affairs nga nakahanda na ang mga contingency measures agud irepatriate ang mga Filipinos nga maapektuhan in kaso nga maglala ang tension sa tunga sang Ukraine kag Russia.
Sa isa ka statement, ginpahayag sang DFA nga may close coordination ini sa diplomatic posts sa rehiyon agud marepatriate ang mga Filipinos sa Ukraine nga luyag nga magpauli sa Pilipinas.
Suno sa DFA, nagapabilin nga fluid ang sitwasyon sa border sang Ukraine kag posible nga magbag-o ang security conditions sa maskin ano nga oras.
Kapin 380 ka mga Filipinos nga nagaistar sa Ukraine, kun sa diin kalabanan ang yara sa Kyiv, ang nahamtang malayo sa eastern border nga malapit sa Russia.
Suno sa ahensya, nagapakig-angot ini sa Filipino community, kasubong man sa iban nga governments kag international partners tuhoy sa mga Filipino nationals nga luyag magrelocate sa mas secure nga lugar.
Nagapakig-angot man ini sa European Union kag ginasiguro ang safe nga paglabay sang mga Filipinos sa EU borders.
Nagapanawagan ang DFA sa mga Filipinos sa Ukraine nga makig-angot sa Philippine Embassy sa Poland kag maghulat sa mga updates, bulletins kag safety instructions.
Bangud nga wala sang embassy sa Ukraine, ang diplomatic post sang Manila sa Warsaw, Poland, ang nagabantay sa pungsod.
