Wala pa sang impormasyon kun may Filipino nga naapektuhan sa pagpangbomba sang Estados Unidos sa tatlo ka mga nuclear sites sa Iran suno sa Department of Foreign Affairs.
Suno kay DFA Assistant Secretary Robert Ferrer, indi maathag kun may mga Filipino nga naulamid sa ginluntaran sang airstrikes apang nagpanugyan ini sa mga Filipino nga maglikaw sa mga pasilidad sang Iran.
Suno kay Ferrer, ginabanta 1,200 ka mga Pinoy ang yara sa karun sa Iran kag siyam ang nagpangabay nga makapauli na sa Pilipinas.
Ginpasiguro man ni Ferrer nga ang mga personnel sang Philippine Embassy sa Tehran ang ulihi nga magagwa sa pungsod agud masiguro nga naatipan anay ang mga luyag nga magpauli.
Samtang, isa naman ka Filipino sa Israel ang yara sa kritikal nga kondisyon kag pito ang nakagwa na sa ospital.
Madumduman nga sang Biyernes, ginpasaka sang gobyerno sang Pilipinas sa Crisis Alert Level 3 ang Iran kag Israel nga nagapatimaan nga ginaabisuhan ang mga Pinoy sa nasambit nga mga pungsod nga boluntaryo nga magpauli bangud sa nagalala nga tensyon.
