Ginakasubo sang secretary general sang United Negros Drivers and Operator Center nga liwat naman nga magapatuman sang pagsaka sa presyo ang produktong petrolyo bwas sa aga.
Karon sa udto, ginalauman nga igaanunsyar sang mga oil companies ang final nga saka sa presyo sang diesel kag gasolina, apang sang Sabado, ginforecast nga magasaka sang P3.20 tubtub P3.40 ang kada litro sang diesel samtang magasaka naman sang P1.70 tubtub P1.90 ang kada litro sang gasolina.
Sa interview sang Bombo Radyo Bacolod kay Diego Malacad, ginakasubo sini nga ang Department of Energy ang wala nakaregulate sang presyo sang produktong petrolyo bangud ang mga dalagko nga mga kumpaniya na ang nagadikta sa ahensya kun magapasaka ukon mapanaog sang presyo sa produktong petrolyo.
Suno kay Malacad, apektado katama ang transport sector sa pabag-o bag-o nga presyo sang oil products.
Ginpahayag man sini nga kun may yara man sang subsidy nga ginahatag ang gobyerno, indi man tanan nga yara sa transport sector ang makabenepisyo.
Suno kay Malacad, kuntani ang ubrahon sang gobyerno, indi na maghatag sang mga cards sa mga beneficiaries, sa baylo magbutang nalang sang lane ang Department of Energy sa mga fuel stations kag didto idirekta ang discount sa fuel agud tanan ang makabenepisyo man kag mabuhin-buhin pa ang corruption.
