Nagtalana sang isa ka conference ang Department of the Interior and Local Government(DILG)-Bacolod City sa lima ka mga barangay kagawad sang Barangay Tangub agud masolbar na ang problema kun sa diin ginapamatukan sang mga ini nga masweldohan ang mga job order employees bangud sa gina-alegar ghost JO’s.
Madumduman nga masobra 50 ka mga job order employees ang nagprotesta sa sagwa sang Barangay Hall sang Barangay Tangub sang tinalikdan nga adlaw bangud duha ka bulan na sila nga wala nakabaton sang sweldo.
Nahibaluan nga wala nagpirma ang lima ka mga barangay kagawad sang resolusyon agud masweldohan ang mga job order employees bangud sa gina-alegar may yara sang mga ghost JO’s.
Sa interview sang Bombo Radyo Bacolod kay Ma. Maredith Joy Madayag, pinuno sang DILG-Bacolod City, ginpahayag sini nga pagasapulon nila ang mga barangay kagawad agud mahitso na ang isyu.
Suno sa iya, yara man lang sa barangay treasurer ang payroll kag iban pa nga mga dokumento nga ila napangita apang indi ini basta-basta nga mapangayo kun wala sang court order.
Dugang pa ni Madayag nga ang tanan nga mga dokumento ang nag-agi sa disbursement kag audit kun sa diin ang mga barangay kagawad ang may yara man sang papel sa disbursement gani dapat nga nakahibalo sila angot sa nagakatabo sa barangay.
Nagalaom si Madayag nga untaton nalang ini sang lima ka mga barangay kagawad bangud nga wala man ini sang padulungan.
