Nagaapelar ang pinuno sang Department of the Interior and Local Government (DILG) Bacolod nga masunod ang memorandum circular sang ahensya nga sa Hunyo 30, matigayon na ang transition sang outgoing kag incoming nga administrasyon.
Sa Hunyo 30, natalana nga maghalin sa opisina si outgoing Bacolod City Mayor Evelio “Bing” Leonardia samtang magabulos naman si incoming Mayor Albee Benetiz.
Suno kay DILG Bacolod City Director Ma. Joy Maredith Madayag, sa Hunyo 22 ang ila inisyal nga petsa sa pagpakigkita sa transition team.
Suno kay Madayag, sila ang maga-assist sa compliance kag magapatunga sa team ni Leonardia kag team ni Benitez agud matigayon ang smooth transition.
Suno sa iya, may memorandum circular ang pagturn-over sang mga dokumento kag naka-enumerate diri nga dapat iturn-over sang outgoing administration sa incoming administration ang mga development plan, climate change adaptation plan, financial documents kag iban pa.
Gani nagahingyo ini nga sundon ang guidelines sa memorandum circular kag tipunon na ang mga dokumento agud wala na sang problema sa pagturn-over.
