Padayun ang panawagan sang Department of the Interior and Local Government – Bacolod City sa mga Barangay officials nga mangin transparent kag magsunod sa guidelines sa paghatag sang programa gikan sa gobyerno.
Ini kasunod sang mga naggwa nga impormasyon, angot sa bata sang Barangay Secretary sa Brgy Punta Taytay kag family member sang Punong Barangay sa Brgy 40, Bacolod City, nga nalakip sa makabatun kuntani sang P20,000 nga scholarship grant sa idalom sang Bawat Barangay Makikinabang (BBM) Program sang Office of the President.
Sa interview sang Bombo Radyo Bacolod kay DILG-Bacolod Director Christian Nagaynay, nakita lamang nila sa social media ang nasambit nga issue, apang wala sang derekta nga nagreklamo sa ila.
Dugang pa sini nga ang mga nasambit nga himata sang Brgy officials ang napalos naman sa listahan antes ginpatigayon ang paghatag sang financial grant.
Ini bangod kasunod sang paglupok sang pila ka mga issue angot sa himata sang Brgy officials sa Negros Occidental nga nakabatun sang Presidential Scholarship, ginpakamaayo sang ciudad nga ipatawag ang Punong Barangay sa 61 ka Barangay agud maseguro ang proseso sang pagpili.
Gin-ilisan man ang mga list nga inisyal nga ginpadala sa portal sang Office of the President./
Dugang pa nga sa ginhimo nga meeting antes ginhatag ang budget, ang mga Punong Barangay ang ginpapirma sang certification nga wala sang nalakip sa listahan nga himata sang Barangay officials.
Aminado si Nagaynay nga wala sa guidelines nga indi pwede malakip ang mga himata sang Brgy officials, apang ini ang gindumili nila agud malikawan na lamang ang conflict of interest.
Samtang padayun man nila nga ginamonitor sa kada Barangay ang postings sa ila official facebook page, bangod ini ang kabahin sang requirement para sa documentation kag transparency.
