Ginpahayag ni Negros Occidental Governor Eugenio Jose “Bong” Lacson nga nagpanawagan si Department of Interior and Local Government (DILG) Secretary Eduardo Año sa mga local government units (LGUs) nga magpasar sang ordinansa nga himuon mandatory ang vaccination.
Ginakwestyon naman sang gobernador kun ngaa ginapasa pa ini sa LGU kun mahimo naman nga maghuman sang mandato bilang National Law.
Apang ginalantaw man sini nga mahimo ipanindugan sang National Government nga magalawig pa antes mapasar kun ipaagi sa kongreso.
Paathag ni Lacson nga tsekyarun man sang mga ini kun ano ang legal basis nga mahimo nila panguyatan para mapatuman ang mandatory vaccination.
Pahayag pa sang gobernador nga may mga legal experts man nga nagapanindugan nga indi mahimo nga pilitun ang mga indibidwal nga magpabakuna ilabi na nga may religious groups nga wala nagapati sa vaccination.
Ginalantaw ni Lacson nga frustrated na ang gobyerno kag nagadali nga malab-ot ang herd immunity nationwide.
Ilabi na nga ginapatuman na sa karun ang pagbakuna sa 12 tubtob 17 anyos kag nalab-ot naman sang National Capital Region (NCR) ang 90 porsyento nga herd immunity.
Dugang pa ni Lacson nga nagdugang sa pagpursige sang gobyerno sa vaccination rollout ang natabo sa Pagadian City kun sa diin 100,000 doses sang COVID vaccine ang nasunog sa isa ka health office.
Ginkatingala naman sang gobyerno kun ngaa tuman ka damo gihapon sang COVID vaccine sa health office sang ini ang nasunog, apisar nga ginamando nga dapat anom ka adlaw lang nga magtinir sa facility ang mga bakuna kag mapanagtag na ini sa nagkalainlain nga LGU.
Makabig naman ini nga pagpanghangkat sa mga LGU ilabi na sa mga Local Chief Executives, kun paano mapatuman ang panawagan nga himuon nga mandatory ang pagpabakuna.
Ginalantaw man ni Lacson nga isa sa rasun sa pagpadasig sang vaccination program ni Presidente Rodrigo Duterte ang bangod sa madamo na sang naga-abot nga bakuna sa pungsod.
Sa karun 12 tubtob 17 anyos palang ang pinakanubo nga ginabakunahan apang suno sa gobernador, mahimo naman ini amat-amat nga magpanaog sa mas manubo nga age group ilabi na nga sa Estados Unidos ginabakunahan na ang 5 anyos nga mga kabataan.
