Nagpasalamat ang pinuno sang Department of the Interior and Local Government Negros Occidental sa mga pumuluyo nga nagrespondi sa ila imbitasyon nga mag-apply bilang contact tracers matapos sini ginkumpirmar nga nalab-ot na sang probinsya ang target sini.
Sa interview sang Bombo Radyo kay DILG Provincial Director Atty. Ferdinand Panes, ginkumpirmar sini nga nalab-ot na gid man sang probinsya ang kapin 1,000 ka mga aplikante nga target sang ahensya agud himuon nga contact tracers.
Suno kay Panes, nagpaidalum sa tatlo ka adlaw nga seminar sang Oktubre 1 ang first batch sang mga aplikante nga ginalakipan sang 450 ka mga persona kag natalana nga ideploy sa nagakinahanglan nga mga local government units.
Suno sa iya, ang 2nd batch ang ginalakipan sang masobra 500 ka mga aplikante nga sa karun ila na ginafinalize agud mapasa sa regional office kag madeploy naman sa madali nga panahon.
Suno sa provincial director, ang tatlo ka bulan nga kontrata sang mga contact tracers ang epektibo halin sa Oktubre 1 tubtob Disyembre 31, 2020.
Nagapasalamat man si Panes sa maayo nga pagresponde sang mga pumuluyo sa ila panawagan kag nagalaom nga mangin tayuyon kag wala sang may magluntad nga encounter sa pagproseso sang deployment sang mga ini.
