Ginpasalig sang Department of the Interior and Local Government nga i-orient ang mga overseas Filipino workers antes ang departure sa Metro Manila nga sundon ang protocol sang ila local government unit kadungan sang ila pagpauli.
Sa teleconference kay Interior Secretary Eduardo Año kahapon, ginpalab-ot ni Negros Occidental Governor Eugenio Jose Lacson ang pagpamalibad sang Negrense OFWs nga mag-upod sa provincial healing center sa EB Magalona bangud wala nila naluyagan ang quarantine facility, sa baylo mas ginpili nila nga magpabilin sa Bacolod Silay Airport.
Sa interview man sang Bombo Radyo, ginpahayag ni Lacson nga wala kuntani nagutuman ang mga OFWs kun nag-upod sila sa EB Magalona bangud nagahanda ang Kapitolyo sang pagkaon para sa ila.
Ginpamatian naman ni Año ang hingyo ni Lacson kag ginpasalig nga ipaidalom sa briefing ang mga OFWs antes ang departure sa Metro Manila.
Aminado naman ang tiglikom nga padali ang pagpapauli sa mga stranded OFWs.
Pagamanduan naman ni Año ang mga miyembro sang kapulisan nga magbulig sa LGU kun magpakatig-a ang mga OFWs.
Si Bacolod City Mayor Evelio Leonardia naman ang nagpanindugan nga ipaidalom sa 14-day quarantine ang repatriated OFWs bangud impractical ang home quarantine.
Ginhalimbawa man sini ang natabo sa tinalikdan nga batch sang mga OFWs nga may isa nga nagpositibo sa coronavirus disease bisan negatibo ini sa rapid test nagikan sa Metro Manila.
Ginatugyan naman ni Año sa LGU kun ano ang ila quarantine protocol para sa returning OFWs bangud yara na ini sa ila discretion.
Suno diri, ang isa ka indibidwal nga nagnegatibo sa rapid test ukon RT-PCR sa iya ginhalinan ang wala sang 100 percent guarantee nga indi malatnan sang virus samtang nagatravel.
