Nagapanawagan ang provincial director sang Department of the Interior and Local Government (DILG) Negros Occidental sa mga kwalipikado nga pumuluyo nga wala sa karun sang ubra nga mag-apply bilang contact tracers sa ahensya.
Sa interview sang Bombo Radyo kay Atty. Ferdinand Panes, nagapanawagan ini sa mga luyag mangin contact tracer ilabi na sa mga graduate sang medical courses nga magpasa sang application bangud nagasugod na sila sa pagbaton sang mga aplikante.
Suno kay Panes, ang mga interesado ang sarang nga makasumiter sang ila application online kun sa diin ang mga requirements ang ginalakipan sang application letter; letter of intent; biodata; NBI clearance; kag drug test result.
Suno sa iya, sarang nga madownload sa ila Facebook page ang letter of intent kag biodata.
Kun luyag naman sang aplikante nga ipasa ang mga requirements sa opisina sang DILG-Bacolod, sarang nila nga ibutang ini sa drop box kun sa diin may maga-assist man nga personnel.
Suno sa iya, kapin 50,000 ka mga contact tracers ang i-hire sa bilog nga Pilipinas kag sang Miyerkules, nakapost na sila sang anunsyo sa ila website kag nagpangayo man sang bulig sa mga alkalde sang tagsa-tagsa ka LGU agud mas madamo ang makahibalo kag mag-apply.
Suno sa iya, Setyembre 21 sila magapatigayon sang screening sa mga aplikante kag ipasa ini sa regional office sang DILG bangud ang regional director ang magadesisyon kun ihire ang aplikante.
Gin-athag man sini nga kun sa nasambit nga ciudad ukon banwa ang isa ka persona nagpasa sang application, wala ini nagakahulugan nga dira man siya idesignar.
Masobra P18,000 naman ang pagabatunon nga sweldo sang contact tracers kada bulan.
