Nagpasalig ang Undersecretary for Peace and Order sang Department of the Interior and Local Government (DILG) sang dugang nga mga assets sa Philippine National Police kag Bureau of Fire Protection sang Negros Island Region.
Sa ceremonial activation sang Police Regional Office – Negros Island Region (PRO-NIR) kahapon, si DILG Usec Nestor Sanares ang nagserbe nga representante sang ahensya bangod indi available si DILG Secretary Juanito Victor ‘Jonvic’ Remulla.
Sa pahayag ni Sanares, bangod ginsipak, mas nagamay ang sakop nga local government units sang Region 6, Region 7 kag Negros Island Region, gani mas matutukan ang karun nga eleksyon.
Suno diri, mas mahitso ang personnel deployment kag police visibility.
Pinaagi sini, malikawan ang mga kinagamo samtang gilayon man madismantle kun may-ara pa sang private armed groups.
Wala man ini sang concern sa NIR bangod lima lamang ka lugar ang yara sa orange category samtang may 22 naman nga green category.
Natalana man nga magpatigayon sang Philippine National Police (PNP) recruitment sa bulan sang Mayo, apang wala pa sini mahibaluan kun pila ang qouta para sa NIR.
Samtang sa 2027, pasalig sini nga kada banwa kag ciudad ang mahatagan sang fire trucks, indi lamang sa NIR kundi nationwide.
Magluwas diri, nagpasalig man si Sanares sang dugang nga police cars kag motorcycle patrols para sa PNP.
