Gilayon nga nagfile sang Certificate of Candidacy si dismissed La Castellana Sangguniang Bayan member Donato “Natnat” Dumaguit kasunod sang pagsurrender sini sa La Castellana Municipal Police Station kahapon.
Madumduman nga si Dumaguit ang involved sa PNP recruitment scam kaupod ang duha ka pulis kag ang mastermind nga si Mary June Delos Santos.
Sa interview sang Bombo Radyo Bacolod kay Police Captain Dennis Melgarejo, deputy chief of police sang La Castellana Municipal Police Station, si Dumaguit ang nagsungka sa ila alas-9:50 kahapon sang aga.
Ini ang nagpyansa sa 12 counts of estafa sa balor nga P220,000.
Apang matapos magpyansa, siya ang ginserbihan sang dugang nga 11 counts of estafa nga wala pa sini mapyansahan.
Gani sa karun nagapabilin pa sa kustodiya sang La Castellana Municipal Police Station ang anay SB member.
Kasunod sang pagsurrender, si Dumaguit ang nagfile man sang COC sa pagpareelect bilang konsehal.
Paathag ni Melgarejo nga tubtob indi pa convicted, nagapabilin ang diber sang mga naaresto nga makapapili sa government position.
Si Dumaguit ang gindismiss bilang SB member matapos ang 14 ka beses nga indi pagtambong sa session.
Samtang una na nga nagsurrender ang mga imbulbado nga kapulisan sa recruitment scam, kag si Delos Santos ang naaresto naman sa Tapaz, Capiz sang Hulyo 4.
Nagdangat naman sa masobra 40 ang complainant nga gina-alegar ginkuhaan sang mga ini sang masobra P200,000 kada isa, sa pasalig nga derekta nga pasudlon sa Philippine National Police bisan wala nakasulod sa husto nga proseso.
