Nagapasalamat si Fr. Jonas Sumagaysay, parish priest sa St. Joseph Husband of Mary Parish sa Barangay Singcang Airport, Bacolod City matapos nga gin-grant ang hingyo ni Bacolod Bishop Patricio Buzon nga idugon ang curfew hours sa alas-11:00 sa gab-i tubtob alas-3:00 sa kaagahon nagikan sa alas-10:00 sa gab-i tubtob alas-4:00 sa kaagahon sugod Disyembre 16 tubtob sa New Year’s Eve.
Sa interview sang Bombo Radyo Bacolod kay Sumagaysay, ginpahayag sini nga tuman gid ang ila pagpasalamat bangud sa paghatag sang kahigayunan sang ciudad nga makapatigayon sang Simbang Gabi.
Dugang pa sini nga ang mas ginpalip-ot nga curfew hours ang magahatag sang oportunidad sa Diocese of Bacolod agud nga makapatigayon sang mas timprano nga Simbang Gabi agud maka-akomodar sang mas madamo nga sumilimba kag mapunggan ang pagdinagsa sang mga tawo.
Suno kay Fr. Sumagaysay, posible nga kalabanan sa mga simbahan sa ciudad ang magpatigayon sang duha ka Simbang Gabi kun kaagahon nga posible magasugod alas-4:00 ukon alas-4:30 sang kaagahon kag isa ka anticipated mass kun gab-i nga magasugod sa Disyembre 15.
Madumduman nga ang bag-o nga curfew hours sa Bacolod ang gin-aprubahan kadungan sa pagpagwa man sang Catholic Bishops’ Conference of the Philippines sang schedule para sa midnight masses sa bilog nga pungsod sugod Disyembre 16 tubtob Disyembre 24.
