Ginpahayag sang Bishop sang Diocese of San Carlos nga iselebrar ang All Saints’ Day kag All Souls’ Day sa matuod sini nga kahulugan.
Sa interview sang Bombo Radyo Bacolod kay Most Reverend Fr. Gerardo Alminaza, ginapatihan nga ang mga minatay ang nangin kabahin na sang katilingban sang Diyos.
Apang, kun kaisa may yara sang nagpabilin sa purgatoryo nga nagapangayo sang pagdumdum kag pagpangamuyo.
Suno diri, kun ginahatagan sang pagpangamuyo ang mga kalag sa purgatoryo kag sila ang nakasaka na sa kaharian sang Diyos, sila naman ang magabulig sa mga tawo sa duta.
Suno pa diri, ang paghalad sang bulak sa mga minatay ang expression sang pagpalangga samtang ang kandila naman ang nagapakita sang pagdumdum kag pagpangamuyo.
Pahayag ni Alminaza, ang All Saint’s Day naman ang mangin selebrasyon sa pagsunod sa santos nga nangin inspirasyon sa mga tawo.
Apang suno diri kun kaisa nagakalipatan na ang kahulugan sang selebrasyon sang All Saints’ Day kag All Souls’ Day kag ini ang ginakabig na lamang nga social gathering.
Gin-athag man sini nga wala sang malain kun magkalipay sa selebrasyon apang magfocus sa matuod nga kahulugan sini kag magsimba kaupod ang pamilya.
