Luyag sang Regional Director sa Police Regional Office 6 nga mapaidalum sa drug test ang tanan nga Police Personnel sa Western Visayas.
Bangod sini, nagpabakal na sang inisyal nga 5,000 ka mga drug testing kits si Police Brig Gen. Sidney Villaflor sa Metro Manila agud magamit para sa inisyatibo.
Paathag sini nga sa kabug-usan nagadangat sa masobra 13,300 ang mga kapulisan sa PRO 6 kag tanan ini ang luyag niya nga mapaidalum sa drug test.
Ang inisyatibo ang una nga patigayunon sa mga Provincial Directors tubtob sa Chief of Police kag kasunod na ang mga yara sa idalum
Panindugan ni Villaflor nga kun may-ara sang magapositibo, wala na sang apelasyon kag ang mahimo na lamang amo ang magrequest sang confirmatory test.
Pahanumdom man sini nga kun ano ang gingamit nga ihi bilang specimen sa una nga drug test, ang nabilin sini ang gamiton sa confirmatory test kag indi magakinahanglan sang panibag-o nga urine sample.
Ginalantaw ni Villaflor nga wala sang rasun nga ang kaangay nga specimen nga nagpositibo sa una nga result ang maganegatibo sa confirmatory test.
Suno diri, ang mga police personnel nga magapositibo sa drug testing ang makaangkon sang dismissal gikan sa Police service.
Luyag ni Villaflor nga tanan nga ang kabug-usan nga Philippine National Police (PNP) partikular na ang PRO 6, nga ginabayaran sang husto, ang magaperform man sang maayo.
