Patay ang isa ka anay pulis matapos ginluthang sang gina-alegar lima ka persona sa Purok Michelle, Barangay Dulao, Bago City.
Ang biktima ang ginkilala nga si Renaldo Bernel, residente sang Barangay Pacol, Bago City.
Sa inisyal nga impormasyon sang Bombo News Team, ang pagpangluthang ang natabo kapin alas-8:30 kaina sang aga.
Ang biktima ang gikan sa pagdul-ong sang iya bata sa eskwelahan kag ini ang pabalik na kuntani sa ginabantayan nga manokan.
Samtang nagadala sang motorsiklo si Bernel, siya ang hinali ginpa-arakan sang luthang sang ginabanta lima ka persona.
Narecover sa scene of incident ang 16 ka fired cartridge sang cal. 5.56mm, siyam ka fired cartridges sang cal. 9mm, isa ka live ammunition sang cal. 9mm, isa ka fired bullet sang cal. 9mm, ang motorsiklo sang biktima, isa ka unit sang handheld radio kag isa ka cellphone.
Nabatian man sang mga residente ang lupok apang wala na naalarma bangod masami man nga nagafiring sa lugar ilabi na nga malapit sa detachment.
Sa karun padayun pa nga nagapatigayon sang pursuit operation batok sa mga suspects.
Nahibaluan nga si anay Police Officer 2 Reynaldo Bernil ang nakaasuhan na sang murder upod kay anay police asset Carlo Riosora sang Silay City Police Station, matapos ginluthang-patay ang isa pa ka pulis nga si SPO4 Roger Cañete sa banwa sang Brgy. Poblacion Dos, EB Magalona sang 2015.
