Nag-umpisa na sang Miyerkules ang pagpanagtag sang Pantawid Pasada Card nationwide para sa mga drivers sang pampubliko nga transportasyon.
Suno kay Land Transportation Franchising and Regulatory Board (LTFRB) Region 6 Director Richard Osmenia, masobra 7,000 ang mga benepisyaryo nga mga jeepney drivers sa Western Visayas.
Pasalig naman sang opisyal nga ila igamonitor subong nga adlaw kun pila na sa mga drivers ang nakabatun.
Suno sa regional director, P6,500 ang igahatag nga fuel subsidy sa kada driver.
P2.5 billion ang orihinal nga budget para sa programa apang matapos sang tuman nga pagsaka sa presyo sang produktong petrolyo, ginpakamaayo man nga ini ang dugangan sang adisyunal nga P2.5 para sa 2nd tranche.
Ang 1st tranche ang ipanghatag subong nga Marso samtang sa Abril naman ang distribusyon sang 2nd tranche.
Ang mga jeepney operators gihapon ang nagakapot sang Pasada Card.
Ini bangod ang mga jeepney units kag franchise ang nakapangalan sa operators.
Isa naman sa indi luyag nga maliwat sang opisyal ang mga kaangay nga hitabo sa nakaligad nga distribusyon kun sa diin ginawithdraw sang mga operators ang kwarta apang wala ginaturn-over sa mga drivers.
Gina-ayo naman sang LTFRB 6 Director sa mga operators nga ihatag gid sa drivers sang benipisyo nga para sa ila agud nga mabakal sang gatong.
Suno kay Osmenia, bangod ang operators ang masami nagabatun lang sang boundary samtang sa kita sang drivers naman nagagikan ang ginatughong nga gatong, nagakadapat man nga sa mga drivers magakadto ang fuel subsidy.
Wala naman sang accredited gasoline station nga ginkontrata ang gobyerno gani may ligwa ang mga drivers sa pagpili sang gasolinahan nga baklan.
