Ginsuguran na subong nga adlaw ang distribution sang social pension para sa mga senior citizens sa ciudad sang Bacolod nga nagaedad 70 anyos pasaka.
Sa karon, 1,000 pa lang ka senior citizens ang ginhatagan sang P3,000 ukon tag-P500 kada bulan sa sulod sang anom ka bulan.
Ang payout kaina ang ginpatigayon sa Barangay Sum-ag, Villamonte, Montevista kag sa Bacolod City Government Center samtang padayon man ang validation sa iban nga barangay.
Ang paghatag sang P3,000 nga social pension sa indigent senior citizens ang base sa ordinansa nga ginduso ni City Councilor Celia Flor nga amo ang chairperson sang committee on senior citizens and veterans affairs sa Sangguniang Panlungsod.
Suno kay Flor, P500 kada bulan ang batunon sang kada senior citizen apang gintingob ang social pension halin sang Enero tubtub bulan sang Hunyo gani P3,000 ang ila nabaton.
Bangud limitado pa lang ang pondo sang Bacolod City government nga P3 million, 1,000 pa lang ka senior citizens nga nagaedad sang 70 anyos ang ginhatagan.
Naghingyo man ini sa mga barangay nga dasig dasigon ang pagsumiter sang listahan agud nga makabaton na gilayon ang mga kwalipikado.
