Naghingyo sang pasaylo ang district engineer sang Bacolod City Engineering District bangud sa paggutok sang dalagan sang trapiko halin sa Bangga Cory padulong sa Bangga Metal sang Sabado bangud sa pagpalapad sang taytay.
Duha lang kuntani ka oras ang trabaho sa taytay apang bangud nag-ulan, nagsugod ini alas-10:00 sa aga kag natapos alas-3:00 sa hapon ang trabaho sang Silver Dragon Construction.
Suno kay Engr. Abraham Villareal, nagcoordinate ang DPWH sa Office of the Mayor paagi sa sulat nga ginpaagi sa Bacolod Traffic Authority Office kag naghingyo man sila sang assistance sa BTAO angot sa pagdiriher sang trapiko sa amo nga oras.
Suno kay Villareal, may yara sang billboard sa magtimbang nga punta sang taytay nga ginpost isa ka semana antes ang pagsugod sang trabaho.
Nagcoordinate man sila sa Bacolod City Water District, Central Negros Electric Cooperative kag mga telecommunication companies angot diri.
Suno diri, dapat palaparon ang taytay bangud palaparon ang dalan sa lugar.
Naghingyo naman si Bacolod City Mayor Alfredo Benitez sa DPWH nga pahibaluon ang Public Information Office sang ciudad agud nga mapalapta ang impormasyon bangud tuman ini ka importante para sa publiko.
