Ginalauman nga matapos sa bulan sang Disyembre subong nga tuig ang ginpahimo nga Diversion Channel sa Reclamation area, Bacolod City.
Sa interview sang Bombo Radyo Bacolod kay Bacolod City Mayor Greg Gasataya nga long overdue na ang diversion channel kag delayed na ini.
Suno kay Gasataya ang Department of Public Works and Highways (DPWH) ang nagasupervise sang pag-ubra sini kag wala siya makahibalo kun may ginpatuman nga suspension sa contractor.
Suno diri, ang pila pa ka mga iinstall diri ang flap gate kun sa diin ini ang manual nga kaangay sang puertahan nga ginasira agud nga indi magsulod ang tubig sa tion nga magtaob samtang ginabuksan naman agud nga mapagwa ang tubig kun nagaulan.
Samtang ang Sluice gate naman ang control gate nga ginagamit sa sapa, kanal kag drainage system kun sa diin ini ang nagacontrol sang pagbukas kag pagsira agud nga makontrol ang dalagan kag volume sang tubig.
Ginalauman nga matapos ang diversion channel sa bulan sang Disyembre kadungan sang pagtapos sang installation sang inlet kag flap gate.
