Nanindugan ang Department of National Defense (DND) nga wala sang kinamatarong nga magpangayo sang paathag ang Chinese Embassy angot sa operasyon sa Sanjia Steel Corporation, kag ginsiling nga wala sang obligasyon ang ahensya nga sabton ang mga pamangkot sang sin-o man nga dumuluong.
Suno kay DND spokesperson Arsenio Andolong, dapat ang Chinese embassy mismo ang maghatag sang paathag kun ngaa ginatolerar sang China ang mga ilegal nga aktibidad sa teritoryo sang Pilipinas.
Ini angot sa operasyon sang Mayo sa Sanjia Steel Corporation kun sa diin gin-aresto sang mga otoridad kaupod ang Armed Forces of the Philippines, ang pila ka mga Chinese workers.
Ginkwestyon sang Chinese Embassy ang nangin papel ni Defense Secretary Gilberto Teodoro Jr. sa operasyon.
Sa pahayag sang embassy spokesperson nga si Ji Lingpeng, ginpamangkot sini kun ngaa nagapasilabot ang tiglikom sa isa ka law enforcement operation.
Dugang pa sang Chinese Embassy nga wala ginsabat sang DND ang mga pamangkot sini kag gintawag nga “evasive and deceptive” ang pahayag ni DND spokesperson Arsenio Andolong.
Nagsabat naman si Andolong nga “evasive, crass, and galling” ang nangin reaksyon sang Chinese Embassy.
Ginpahayag sang DND nga padayon ang gobyerno sa pagpatuman sang mga layi sang Pilipinas kag pagtapna sa anuman nga paglapas, apisar pamatukan ini sang Chinese Embassy ukon iban nga partido.
