Ginaplastar na sang Department of Energy ang deployment sang solar battery storage systems kag power barges bilang short term solutions sa lapnagon nga power outage sa Visayas.
Ini ang ginkasugtan sa Joint Congressional Public Hearing angot sa Visayas Power Crisis kahapon nga ginpatigayon sa isa ka hotel sa Lacson St, ciudad sang Bacolod.
Suno kay House Deputy Speaker kag Bacolod City Lone District Alfredo “Albee” Benitez, ang pagdeploy sang battery storage systems kag power barges ang short term solution agud may back up kun inkaso may maguba naman nga planta.
Ginalantaw sang Kongresista nga paagi sini, malikawan ang pagdeklarar sang Yellow kag Red Alert Status.
Ginapaabot nga ini ang masuguran sa subong nga tuig ukon sa 1st quarter sang 2027.
Samtang, ginpahayag ni Benitez nga padayon nila nga ginatalakay kaupod DOE kag iban pa nga stakehokders ang long-term solution agud masiguro ang bastante nga supply sang kuryente.
Suno sa Kongresista, may ginpresentar nga road maps ang DOE nga mangin basehan para sa energy security.
Ginapawagan naman sini ang suporta sang tanan nga stakeholders agud mapadasig ang pag-implementar sini.
