BACOLOD CITY – Nagalaum ang dog lover nga si Cherry May Herrera nga mahatagan na sang dog shelter ukon ilistaran ang madamo nga idu nga iya gin-adoptar gikan sa Bacolod City Dogpound.
Sa interview sang Bombo Radyo kay Herrera, ginpahayag sini nga may isa nga nag-contact sa iya nga luyag mag-organisar sang dog shelter para sa 75 na tanan ka mga idu sa iya paghinakop apang wala ini natigayon.
Subong may nagapakig-istorya naman sa iya parte sa kasubong nga tinutuyo kag nagalaum si Herrera nga madayon na ini.
Nahibaluan nga nabutang sa nagkalain-lain nga lugar ang mga idu nga ginpang-adoptar sini bangud wala ini sang masangkad nga lugar nga butangan sang mga ini.
Samtang, malipayon naman si Herrera bangud nangin positibo ang reaksyon sang publiko sa ginhimo sini nga pag-adoptar sa masobra 60 ka mga ido sa dogpound agud maluwas ang mga ini sa kamatayon.
Nahibaluan nga igapaidalom kuntani sa euthanasia ukon pagapatyon ang mga ido bangud indi na makasarang ang dogpound sa pag-atipan sa ila.
Nagalaum ini nga indi lamang kutob sa pagdayaw ang ila himuon kag sa baylo, mag-adoptar man sang mga idu agud maluwas ang mga ini sa kamatayon.
