Naghatag man sang pahayag ang duha ka residente sang Greenplains Subdivision, Barangay Singcang Airport Bacolod City sa naeksperensya sang mga ini angot sa negosyante nga nagluthang patay sa ido nga Siberian Husky nga si Skittles.
Sa interview sang Bombo Radyo kay Bernardita Rodrigo, nakaligad nga duha ukon tatlo ka tuig, mahimo nga may gintuyo man nga tiruhon nga ido ang negosyante nga si Dominador Bangero, apang ang bala ang nag-igo sa bintana ni Rodrigo nga naglusot sa ila nga kwarto kag nagtupa sa katre, nga suno diri maayo gid lamang sadto lang naggwa sa kwarto ang utod sini.
Pahayag ni Rodrigo, apisar nga ginpapadulongan ni Bangero sang trabahador ang balay ni Rodrigo para islan ang naguba nga bintana, wala naman ini nakabati na nagpangayo sang pasaylo ang negosyante.
Samtang suno naman kay Mars Petronio, nga nagarenta sa nasambit nga lugar, masami nga nagaggwa ang ido sini nga aspin nga ila man gina-updan.
Isa ka bes, gin-updan sang hinablos sini ang ila nga ido sa gwa sang nakibot na lamang siya sang nabatian nga nagpiyangak ang ila ido.
Sang ginpamangkot sini ang iya hinablos, gintirador ni Bangero ang aspin apisar nga wala man sang nahimo nga malain ang ido.
Kag matapos ang pila ka semana, suno kay Petronio may yara pa gid sang isa man ka ido nga malabay man lang kuntani apang ini man ang gintirador ni Bangero.
Samtang, sa Martes maga-atubangay sa barangay ang duha ka partido nga sanday Eduardo Libo-on, tag-iya sang Siberian Husky nga si Skittles kag Dominador Bangero, ang nagluthang-patay sa ido.
