Nagpanghatag sang hygiene kits kag prophylaxis batok sa leptospirosis ang Department of Health sa mga naapektuhan sang pagbaha sa Southern Negros Occidental.
Sa interview sang Bombo Radyo Bacolod kay Negros Occidental 6th District Representative Mercedes “Chedeng” Alvares, nagdangat na sa 1,500 ang evacuees sa ila distrito kahapon.
Iban sa mga evacuees ang amat-amat naman nga nagpauli.
Ginapakamaayo naman sang Congresswoman ang pamalakad sa karun ni Department of Social Welfare and Development (DSWD) Secretary Rex Gatchalian, bangod antes paman ang kalamidad may mga nakapreposition na nga mga family food packs.
Apang aminado si Alvares nga kinahanglan ang kooperasyon sang local government units (LGUs) nga amo ang nakahibo sang numero sang affected, antes irelease ang mga food packs.
Ang DOH ang naghatag man sang hygiene kits kag prophylaxis para sa mga naglusong sa baha bangod sa makaalarma nga kaso sang leptospirosis.
Magluwas sa mga evacuees nga naglusong sa baha, isa gid sa prayoridad nga ginhatagan sang prophylaxis amo ang mga rescuers kag responders.
