Kadungan sa ginabantayan nga kaso sang COVID-19 sa Western Visayas, isa man sa ginabantayan ang kaso sang Dengue.
Santo sa commulative data sang Department of Health (DOH)-Western Visayas humalin sang Enero 1 tubtob Mayo 8, 2021, may ara sang nakita nga 72 porsyento nga pagnubo sa kaso sang dengue kun ipaanggid sa nangin kaso sa kaangay nga petsa sang tinalikdan nga tuig.
Sa kabug-usan nagdangat sa 680 ang narecord nga kaso sang dengue sa Western Visayas subong nga tuig samtang nagdangat naman sa 2,466 ang narecord sang Enero 1 tubtob Mayo 8, 2020.
Sa mga kaso sa Region 6, nagpanguna ang probinsya sang Negros Occidental sa may pinakamataas nga kaso nga nagdangat sa 152 kag tatlo nga mga nadulaan sang kabuhi.
Ini ang ginsundan naman sang Iloilo nga may 128 ka mga kaso kag isa nga nagtaliwan; Antique nga may 118 ka mga kaso kag isa nga nagtaliwan; Iloilo City nga may 95 ka mga kaso kag wala sang fatality; Capiz nga may 86 ka mga kaso kag isa nga nagtaliwan; Bacolod City nga may 63 ka mga kaso kag duha nga nagtaliwan; Aklan nga may 28 ka mga kaso kag Guimaras nga may 10 ka mga kaso kag lunsay wala sang fatalities.
Sa kabug-usan nagdangat sa walo ang mga nadulaan sang kabuhi sa Western Visayas bangod sa dengue.
Samtang 38 porsyento naman sa mga narecord nga dengue cases ang nahibaluan nga naga-edad sang isa tubtob napulo ka tuig nga mga kabataan.
