Nagpahanumdum ang officer-in-charge Division Chief sang Health Support Division sang Department of Health Region 6 sa mga pumuluyo nga likawan ang pagpalupok kasubong man ang paggamit sang torotot sa pagselebrar sang Bag-ong Tuig.
Kahapon, nagpatigayon ang Provincial Health Office (PHO) kag Department of Health Region 6 sang Fireworks – Related Injury Awareness Campaign sa Nature’s Village sa ciudad sang Talisay bilang kabahin sang Iwas Paputok campaign sang DOH.
May yara man sang representative nagikan sa Bureau of Fire Protection – Negros Occidental nga nagtambong sa programa.
Suno kay Dr. May Ann Sta. Lucia, mas maayo kun magpangita na lamang sang iban nga pamaagi sa pagsugata sang Bag-ong Tuig kag indi maggamit sang palupok agud malikawan man ang mga indi maayo nga insidente.
Ginaabiso man sini nga likawan ang paggamit sang torotot agud malikawan ang paglapta sang COVID-19.
Sa data sang DOH Western Visayas, ang Negros Occidental ang nakarekord sang pinakamadamo nga firecracker related incidents humalin Disyembre 21, 2021 tubtob Enero 6, 2022.
Ang probinsya ang nakarekord sang 50 ka mga nabiktima sang palupok sa nasambit nga petsa samtang ang Bacolod City ang nakarekord sang napulo.
Ang Aklan ang may yara sang 16 ka mga firecracker victims, lima sa Antique, 15 sa Capiz, isa sa Guimaras, 29 sa Iloilo Province kag apat sa Iloilo City.
