Pabor ang isa ka opisyal sang Department of Health Region 6 sa mando ni Presidente Rodrigo Duterte nga iga-ban ang paggamit sang vape sa pampubliko nga lugar kag importasyon sang vaping products.
Sa interview sang Bombo Radyo Bacolod kay John Lapascua, Senior Health Program officer sang DOH Region 6, maayo nga tikang ang ginmando sang presidente bangod isa ini ka paagi nga makapanubo sang numero sang mga nagagamit sang vapes.
Apisar nga less harmful ang vapes suno sa iya wala ini ginarekomendar bangod pareho lamang ini sa sigarilyo nga maka-aladik sa padayon nga paggamit.
Suno kay Lapascua, may yara sang kapin 316 ka vapes nga naglupok sa bilog nga kalibutan kag apisar nga indi tanto ka delikado ang vaping, indi naman ini hilway sa aton ikaayong lawas.
Suno diri, pareho nga apektado ang active nga naga-gamit kag ang nagahaklo sang aso sini kag makatuga sang lung cancer sa dalayon nga paggamit.
Sa datos sang DOH, mas lamharon ang edad sang nagagamit sang vape, kag nagapati man siya nga ang mga tawo nga nagagamit na sang vape ang posible nga magsaylo sa paggamit sang tradisyunal nga tabaco.
