Wala nagpagwa sang COVID-19 regional report ang Department of Health Western Visayas kahapon bilang pagpreparar sang “harmonized reporting” sini.
Ini ang gin-anunsyar sang ahensya sa ila official Facebook page.
Suno sa statement ni Regional Director Marlyn Convocar, ang harmonized reporting ang ibalhin nagikan sa reporting nga ginapangunahan sang Centers for Health Development padulong sa reporting sang DOH Central Office.
Suno diri, ang data nga natipon nagikan sa regional CHDs ang igasumiter sa DOH Central Office para sa consolidation kag uniformity sang reporting sa regional level.
Ang pagpagwa sang regional COVID-19 bulletin ang magaresume subong nga adlaw, Hulyo 31.
Samtang, sa data nga ginpagwa sang probinsya sang Negros Occidental, 23 ka kaso ang nagdugang kahapon.
Duha diri ang frontliners, duha ang domestic kag 19 ang locally stranded individuals.
Sa ginpagwa naman nga data sang Bacolod City Health Office kagab-i, nadugangan sang 17 ang kompirmado nga kaso sa ciudad kag nalakip diri ang isa nga nagtaliwan.
Sa karun, may yara na sang kabug-usan nga 439 ka mga kompirmado nga kaso sang COVID-19 sa Negros Occidental samtang 194 sa ciudad sang Bacolod.
