Nagpangabay ang Department of Justice (DOJ) kag ang mga kaangot nga ahensya sini sang mas dako nga confidential funds para sa ila mga operasyon sa 2027.
Sa ginpatigayon nga Senate budget hearing kahapon sang Huwebes, ang DOJ may yara sang P579.4 million budget para sa confidential funds, sa diin 47.3 percent nga mas manubo sangsa P1.1 billion nga pondo sang 2026.
Ginhingyo ni Justice Secretary Fredderick Vida nga mabalik sa P500 million ang pondo para sa Office of the Secretary, matapos ginpahayag nga P319.9 million lamang ang gin-alokar para diri sa idalom sang National Expenditure Program (NEP).
Ginsiling ni Vida nga kulang ang P10 million sa Inter-Agency Council Against Trafficking, kag kinahanglan nga madugangan bangud nagapangatubang sila sang bag-o nga mga challenges.
Gin-request man niya sa Kongreso nga i-grant ang P5 million para sa National Coordination Center Against Online Sexual Abuse or Exploitation of Children and Child Sexual Abuse or Exploitation Materials (NCC-OSAEC-CSAEM).
Sa pihak nga bahin, nagpangabay man si Bureau of Immigration (BI) Commissioner Joel Viado sang dugang nga P10 million tubtob P20 million para sa 2027 confidential funds sang ahensya.
Samtang, ang National Bureau of Investigation (NBI) nagpangabay naman sang P1 billion budget nga i-alokar sa confidential funds bangud plano sang ahensya nga mag-procure sang dugang nga equipment batok sa cybercrime.
