Ginalantaw nga malapit nalang kag masarido na ang kaso sa pag-assassinate kay Negros Oriental Governor Roel Degamo, matapos nga ginbuyagyag ni Justice Secretary Jesus Crispin Remulla nga sila ang may ginakaptan na nga dako nga ebidensya nga mahimo magresulta sa pagkasolbar sang kaso.
Ginpahayag ni Remulla kahapon, Marso 8, nga may-ara sang video ang mga suspetsado sa pagpatay sa gobernador kun sa diin sila ang nagadiskusyon sa gina-alegar mastermind sa krimen.
Apisar nga nagbalibad na si Remulla sa paghatag sang dugang nga detalye, gin-athag sini nga dako ang papel sang video sa nagapadayun nga imbestigasyon.
Bangod sa mga testimoniya kag ebidensya gikan sa mga suspetsado, nagapati ang Justice Secretary nga malapit nalang kag matapos na ang imbestigasyon.
Madumduman nga kasunod sang pagpatay kay Governor Degamo sa banwa sang Pamplona, nahimo nga maneutralize sang mga otoridad ang lima sa mga gunmen kun sa diin apat sa mga ini ang naaresto samtang isa naman ang napatay.
Sa karun masobra sa lima pa ang mga nabilin nga suspetsado nga padayun nga ginapangita.
Ang mga suspetsado ang ginpasakaan sang kaso nga multiple murder kag frustrated murder kasubong man illegal possession of firearms and ammunition.
Samtang duha naman sa mga nadakop nga suspetsado ang ginpaidalum sa witness protection program.
Sa pihak nga bahin, ginmando naman sang Philippine National Police (PNP) ang pagrelieve sa tanan nga personnel sang Bayawan City Police Station, nga ginalakipan sang 75 ka mga personnel kalakip na ang hepe nga si P/Lt.Col Rex Aboy Moslares.
Si Moslares ang ginbuslan naman ni P/Lt.Col Stephen Amamaguid nga gikan sa Cebu.
Ang tikang sang PNP ang ginpatigayon matapos nga naggwa sa initial ballistic examination nga ang mga bala nga narecover gikan sa lawas ni Governor Degamo ang nagikan sa isa sa mga assault rifles nga narecover sa mga suspetsado sa pagpatigayon sang hot pursuit operations.
Madumduman nga indi lamang si Governor Degamo ang napatay sa insidente bangod may walo ka mga inosente nga sibilyan ang naulamid nga ginpatay sa assassination.
Natumod naman ang tag-iya sang mga salakyan nga gingamit sang mga suspetsado kag ini ang gina-imbestigaran na kun may kaangtanan sa krimen.
Ginsaylo naman sa Manila ang mga suspetsado para sa ila nga seguridad.
Ini ang ginbuhat sang PNP agud maseguro nga hilway ang mga suspetsado kag agud malikawan ang posibilidad sa pagtinguha nga sila ang mapapapalagyo gikan sa detention.
