Ginpanugyan sang isa ka doktor nga indi pagmalisyahan ang provincial government sa Negros Occidental may kaangtanan sa wala pa mahatag nga Health Emergency Allowance.
Sa interview sang Bombo Radyo Bacolod kay Dr. Vicente Iturriaga, siya ang nagretiro na bilang medical doctor sa Teresita Jalandoni Provincial Hospital apang siya ang may kuluhaon paman nga HEA bilang frontliner sang COVID-19 pandemic.
Apang pahanumdom sini nga indi dapat malisyahan ang kapitolyo, bangod ang budget ang nagagikan sa Department of Health national office panaog sa DOH Regional Offices.
Suno kay Iturriaga, gintawagan sini ang human resource personnel sa Regional Office sa Iloilo agud hibaluon ang status sang HEA.
Gin-eksplikar sa iya nga first come first serve ang paghatag sang HEA, kag bangod ulihi nga nakasumiter ang provincial government sang memorandum of agreement (MOA).
Mahimo may nagakwestyon kun ngaa nauna na nga nahatagan ang mga private hospitals sa Negros Occidental, apang pahanumdom sini nga ang provincial government ang may gina-uyatan nga madamo nga ospital gani madugay ang pagtapos sa mga dokumento.
Suno diri, ginpasalig sang DOH personnel nga wala na sang problema sa papelis sang provincial government sa baylo ginahulat na lamang nga mapanaog ang budget.
Pahayag sini nga sila ang nahatagan na sang HEA apang may kuluhaon pa nga isa ka tuig.
Suno kay Iturriaga, wala ini nagalaom nga mahatag gilayon nga tingob ang kulang sa Teresita Jalandoni Provincial Hospital, bangod aminado ini nga tulungaon man ang budget sa nanarisari nga ospital sa probinsya.
