Narekober man sang Presidential Anti-Organized Crime Commission (PAOCC) ang isa ka sulat gikan sa Office of the President nga pirmado ni anay presidential spokesperson Atty. Harry Roque sa pagraid sa POGO hub sa Porac, Pampanga.
Suno kay PAOCC USec. Gilbert Cruz, ang mga dokumento ang may petsa nga 2021 nga nakumpiskar sa sulod sang Lucky South 99 compound.
Ginpahayag sang opisyal nga kinahanglan pa nila nga iverify ang nasambit nga sulat agud nga masiguro ang aunthenticity sini.
Suno pa sa opisyal, ang dokumento nga pirmado ni Roque ang gikan sa iya nga executive assistant nga nagapangayo sang travel support sa pagpadulong sini sa Poland.
Suno diri, nag-apply sadto ang executive assistant ni Roque para sa Schengen visa.
Samtang ginpahayag ni Casio nga wala sang criminal value ang nasambit nga dokumento sa ila nga nagapadayon nga imbestigasyon batok sa ilegal nga POGOs.
Sa pihak nga bahin, ginpaathag ni Atty. Roque nga maathag nga wala sang kahilabtanan ang narekober nga affidavit of support sa anuman nga POGO operation kundi gingamit ini sa iban nga purpose.
Suno diri, ang mga dokumento ang ginapanag-iyahan sang iya madugay na nga empleyado nga nagatuon sa karun sa Clark nga posible nga malapit sa gin-raid nga POGO hub sa Porac, Pampanga.
Samtang, ginaimbestigaran naman sang PAOCC ang mga opisyal kag incorporators sang Lucky South 99 kag kun nagserbe nga abogado sang mga ini si Roque.
Nagserbe sadto si Roque bilang abogado para sa Whirwind Corporation nga ka real state company nga nagparenta sang property sa Lucky South 99.
