Gin-anunsyar ni Bacolod City Lone District Congressman Greg Gasataya nga ginpahibalo ini sang Department of Labor and Employment Region 6 nga may yara na sa karun sang P157 million nga pondo ang ahensya para sa COVID-19 Adjustment Measures Program (CAMP).
Madumduman nga sang tinalikdan nga Mayo naghatag sang privilege speech si Gasataya nga nagapanawagan sang dugang nga pondo para sa nasambit nga programa sang DOLE matapos madamo nga mga pumuluyo ang wala maka-avail sang ayuda bangud naubusan sang pondo ang ahensya.
Nagpasar man ang kongresista sang house resolution nga nagahingyo kay DOLE Secretary Silvestre Bello III nga buligan ang mga business establishments nga wala nahatagan sang pagtamod sang ahensya nga maka-avail sang benepisyo sa idalum sang CAMP.
Sarang nga maka-apply sa nasambit nga financial assistance ang mga nadulaan sang trabaho ukon palangabuhian bangud sa COVID pandemic.
Indi naman kwalipikado suno sa kongresista ang mga empleyado sang gobyerno kag mga benepisyaryo sa Department of Finance’s Small Business Wage Subsidy, SSS Unemployment Benefit, DSWD Expanded and Enhanced Pantawid Pamilyang Pilipino Program, Assistance to Individuals in Crisis Situation kag Cash Assistance for Rice Farmers.
Ang mga micro, small and medium establishments nga naapektuhan sang pandemya ang mahimo man maka apply on behalf sa ila mga empleyado.
Nagpanugyan si Gasataya sa mga luyag mag-avail sang CAMP nga magparehistro online sa reports.dole.gov.ph.
Ang kada benepisyaryo ang makabaton sang P5,000 nga cash assistance.
