Nagapadayun pa ang paghatag sang assistance sang TUPAD Program sang Department of Labor and Employment (DOLE).
Suno kay Bacolod City Lone District Congressman Greg Gasataya, humalin sang Abril tubtob Mayo yara na sa 1,600 ang kabug-usan nga nakabatun nga benepisyaryo gikan sa lain-lain nga barangay.
Ginapreparar naman sa karun ang para sa Hulyo tubtob Setyembre.
Ang Tupad program ang mabatun sang mga indibidwal nga ginpili gikan sa mga barangay nga natapos na makaliquidate sang napatigayun nga programa sang tinalikdan nga tuig.
Madamo naman sang mga Barangay sa syudad sang Bacolod ang nakabenepisyo na sa programa.
Pahanumdom ni Gasataya nga mas maayo kun matapos sang isa ka barangay ang implementasyon, makapatigayon gilayon sang liquidation agud nga mangin kwalipikado para sa liwat nga pagpatigayon sang tuigan nga programa kag makarequest gilayon sang funding.
Aminado naman ang kongresista nga madasig ang liquidation sang kadamuan nga mga barangay sang tinalikdan nga tuig.
Nakadepende naman sa kadakuon sang barangay ang kadamuon sang benepisyaryo kun sa diin may-aar sang tag-150 kag may iban naman nga yara lang sa 100.
Suno kay Gasataya nga ginatinguhaan nila nga mahatagan ang tanan nga barangay apang pasalig man sini nga wala sang palapit-lapit sa amo nga programa bangod ang ila nga tinutuyo amo ang makabulig sa tawo.
Ang mga benepisyaryo ang pagahatagan naman sang trabaho sa sulod sang 10 ka adlaw kag makabatun sang P3,900 kalakip pa sang insurance, uniforms kag protective gears.
Ginatugyan naman sini sa mga barangay officials ang screening bangod ang mga ini ang magapasa sang listahan sang napilian sa DOLE.
Suno kay Gasataya, quarterly ang pagpatigayon sang programa kag magapadayun pa tubtob sa Desyembre.
