BACOLOD CITY — Patigayunon subong nga adlaw (Martes) ang hearing sang Department of Labor and Employment ukon DOLE may kaangtanan sa aksidente nga nagluntad sa gina-ubra nga mall sa dalan Gatuslao kun sa diin duha ka mga construction workers ang napatay sang Sabado sang kaagahon.
Ini ang kasunod sang work stoppage order nga ginpagwa sang DOLE Region 6 kahapon batok ginatukod nga mall sang Ayala Land Incorporated.
Suno kay DOLE Negros Occidental head Mary Agnes Capigon, ginpagwa ang work stoppage order nagikan sa opisina ni regional director Atty. Johnson Cañete.
Nahisayran nagikan kay Capigon nga gilayon sila nga nagpadala sang labor inspectors sa lugar sang nahibaluan ang insidente agud nga magpatigayon sang imbestigasyon.
Sa pagsikyar sang Bombo Radyo sa lugar, wala sang nagatrabaho sa lugar kahapon nga adlaw.
Suno kay Capigon, batakon lang ang work stoppage order kun masunod sang kontraktor ang procedure para sa clearing.
Madumduman nga patay sa aksidente sanday Heracleo Abraham, 36-anyos, residente sang Purok 6, Sitio Magsungay, Brgy. Singcang-Airport, ciudad sang Bacolod; kag Dodie Boy Mallorca, 32-anyos sang Chamberry, Manapla.
Suno pa diri, isa man sa mga ginapasiguro sang ahensya amo ang safety sang mga pumuluyo nga nagalabay sa palibot sang construction site.
Suno kay Capigon, dapat nga magahatag sang notice ang kontraktor antes sila magbuhos sang semento.
