Nakapreparar na sang mga recovery program ang Department of Labor and Employment (DOLE) Region 6 para sa mga maga-avail sang balik probinsya program sa nagkalain-lain nga sektor sa region 6.
Suno kay DOLE Region 6 public information officer Niezel Anen Sabrido, indi pa ini sarang nga makahatag sang detalyado nga aspeto sang recovery program bangod nagahulat pa sila sang approval kag pondo halin sa gobyerno.
Nahibaluan nga daku ang parti sang DOLE sa pagahimuon nga balik probinsya program angot sa mga livelihood kag employment nga aspeto.
Ginasiguro naman sini nga may recovery program na ang nasyonal kag may mga target ini nga para sa mga rehiyon, apang wala pa makahibalu kung paano iga implementar sa kada rehiyon bangod wala pa ang guidelines.
Suno kay Sabrido, ginahulat nalang ang pagsulundan humalin sa central office kag gilayon man ini nga ipahibalo sa mga pumuluyo kag kliyente kun paano maka-avail.
Samtang, ang pondo naman nga yara sa DOLE gikan sa gobyerno ang ginpain sa mga nauna nga programa kaangay sang CAMP, AKAP para sa mga OFW kag ang gintalana para sa mga informal sector, apang wala pa sang natalana para sa Balik Probinsya, Bagong Pag-asa nga panibag-o nga programa.
Nakapreparar naman ang mga ini sang apat ka sahi sang recovery program, apang magadepende pa ini sa igahatag nga pondo.
May gina-propose naman nga kabug-san nga balor sang pondo ang DOLE apang wala pa ini ginapahibalo sa publiko bangud nakadepende gihapon sa gobyerno kun pila ang pondo nga igahatag.
Nahibaluan nga ang nagapanguna nga rason sa pagpasar sang Balik Probinsya, Bagong Pag-asa Program amo ang pagdecongest sa NCR.
