Ginpahayag sang chairman sang Committee on Education sa Sangguniang Panlungsod nga ang Don Alberto Arceo Sr. Elementary School sang Barangay Alangilan ang masunod nga target agud patigayunan sang limited face to face classes.
Madumduman nga opisyal na nga ginsuguran ang pilot implementation sang limited face-to-face classes sa Alangilan National Highschool kahapon sang aga.
Ang nasambit nga eskwelahan ang pinakauna nga buluthuan sa syudad nga napahanugutan na sa pagbalik sa in-person classroom instruction makaligad sang kapin duha ka tuig humalin sang ginpa-untat ang face-to-face classroom instruction bangod sa COVID-19 pandemic.
Sa karun, 40 ka mga Grade 12 Senior Highschool students palang sa Technical-Vocational-Livelihood (TVL) Track nga ginalakipan sang 1st batch nga 20 ka mga estudyante sang Lanscape Installation and Maintenance kag 2nd batch nga 20 ka mga estudyante sa Contact Center Services.
Sa interview sang Bombo Radyo kay Councilor Renecito Novero, makit-an gid ang excitement kag kalipay sa mga nakigbahin sa pagbalik sang face to face classes apisar nga ini ang limitado lamang.
Suno kay Novero, fully vaccinated na ang mga estudyante kag manunudlo nga nakigbahin subong man ang ila mga panimalay bangud ini ang requirement sang gobyerno.
Suno sa iya, apat ka adlaw sa isa ka semana lang magapadulong sa eskwelahan ang mga kabataan kag manunudlo bangud ang isa ka adlaw ang napartinisir sa disinfection.
Suno diri, natunga sa duha ka team ang mga estudyante kun sa diin ang kada grupo ang ginalakipan sang 20 ka mga persona.
Kun ang Team A ang yara sa eskwelahan sa una nga semana, ang Team B ang magapabilin sa ila balay kag magaobserbar sang modular instruction and vice versa.
Sa mga workshops naman nga patigayunon, ginalimitahan lamang sa 12 ka mga estudyante ang sarang makapakigbahin.
Nagalaom ini nga madugangan pa ang mga eskwelahan nga makabalik na sa face to face classes kag suno diri, ang ila masunod nga target amu ang Don Alberto Arceo Sr. Elementary School.
