Nagahingyo sang pasaylo ang alkalde sang banwa sang La Castellana sa mga mahimo na-offend sa ila nga protocol may kaangtanan sa paghatag sang donasyon sa mga evacuees sang paglupok sang bulkan Kanlaon.
Sa interview sang Bombo Radyo Bacolod kay La Castellana Mayor Rhummyla Nicor Mangilimutan, sila ang estrikto sa monitoring sang mga donasyon ilabi na nga may Commission on Audit kag madamo nga mga ahensya nga nagatutok sa ila.
Suno diri, kun ang donasyon ang bastante kag palarehas nga mapanagtag sa mga benepisyaryo, ini ang ila nga ginapahanugutan nga derekta nga madistribute.
Apang kun kulang ang numero sa kadamuon sang mga evacuees, ini ang ginapahigad anay tubtob sa makatipon sang bastante nga numero sang kaangay nga donasyon kag amo palang ginapanagtag.
Ini agud malikawan ang sitwasyon nga may evacuees nga magreklamo nga dyutay ang ila nabatun kun ipaanggid sa iban nga biktima.
Nahibaluan nga may isa ka fraternity nga magadala kuntani sang bulig sa mga Barangay nga apektado, apang sila ang nabalabagan sang checkpoint.
Apang paathag sang alkalde nga sila ang ginhatagan lamang sang derektiba nga ipaagi opisyal ang donasyon, bangod ini ang pagsulundan.
Panindugan sang mga ini nga ang mga wala nag-evacuate ang ila nga luyag buligan bangod bastante na ang bulig sang mga yara sa evacuation centers, apang suno kay Mangilimutan, mas kinahanglan sang mga evacuees ang bulig bangod sila ang indi makahulag indi kaangay sang mga yara sa gwa sang evacuation centers.
Nagpangayo ini sang pasaylo kun na-offend ang mga ini, apang panindugan sang alkalde nga mas magamo kun wala ginasunod ang polisa.
Kahapon, sila ang nakabatun naman sang dugang nga 4,000 family foodpacks gikan kay House Speaker Martin Romualdez.
Sa pihak nga bahin, ginalantaw sang alkalde nga siya ang ginagub-an lamang, matapos nga may mga tuman ka mahal nga ginabaligya nga bottled water nga nakapangalan sa iya.
Paathag sini nga madamo sang donasyon nga tubig kag gallon nga dalagko ang ila ginapanghatag kag may common area man kun sa diin makakuha sang libre nga tubig ang mga evacuees.
