Nagapatigayon ang Department of Tourism (DOT) sang isa ka bulan nga programa sa paghanas sa mga frontliner bilang preparasyon sa pag-host sang Pilipinas sa 49th ASEAN Summit and Related Meetings sa Nobyembre.
Nakabase ang programa sa Filipino Brand of Service Excellence (FBSE) agud nga ipreparar ang mga magatambong nga magaserbe bilang liaison officers, information officers, kag ushers sa mga gintalana nga venue, hotel, kag airports.
Suno sa DOT, nagdangat nasa 244 participants nagikan sa pito ka mga batch ang ila nga na-train humalin sang Oktubre 19.
Gindisenyo ni DOT Assistant Secretary Ma. Christina G. Aquino ang curriculum kalakip ang mga kilala nga eksperto bilang speakers agud nga magtudlo sang mga pagsulundan sa diplomacy and services.
Ginpaidalom man ang mga participants sa mga stress test, panel interview, kag site inspection agud masiguro kun ano sila ka preparado antes ideploy sa mga gintalana nga pwesto.
Suno kay Tourism Secretary Dita Angara-Mathay, katuyuan sini nga maipakita ang pinakamaayo nga Filipino hospitality kag magbilin sang maayo nga impression sa mga international delegates.
Una na nga ginpatigayon ang pila ka mga aktibidad sang ASEAN sa Visayas, kun sa diin ginpakita ang mga managmani nga lugar nga ginkalingawan sang mga bisita.
