BACOLOD CITY— Ginahulat sang Department of Tourism Region 6 ang duha ka mga dokyumento may kaangtanan sa ginbuy-an nga paandam ni Presidente Rodrigo Duterte nga ipasira ang isla sang Boracay sa tion nga indi masolusyunan ang environmental issues diri sa sulod sang anom ka bulan.
Sa interview sang Bombo Radyo, ginpahayag ni DOT Region 6 director Atty. Helen Catalbas nga wala na ini nakibot sa pahayag ni Duterte bangud nakatambong siya mismo sa Cabinet meeting sang Lunes.
Sa amo nga pagsinapol, ginplastar sang DOT ang mga violations sa Boracay.
Kalakip na diri ang mga structures nga malapit na gid sa baybay, pagtindog sang mga structures sa waterways kag floodways rason nga nagabaha, magutok nga dalagan sang trapiko kag mga building nga wala nagaangot sa sewerage treatment plant.
Bangud sini, ginmanduan ni Duterte si DENR Secretary Roy Cimatu nga solusyunan ang environmental problems sa Boracay sa sulod sang anom ka bulan.
Suno kay Catalbas, ginahulat niya sa karon ang minutes sang Cabinet meeting kag ang kopya sang Executive Order sang presidente nga magatukod sang inter-agency task force para sa Boracay.
