Nakibot ang bag-o nga tiglikom sang Department of Transportation sa mga problema sang Jeepney Modernization Program.
Sa interview sang Bombo Radyo Bacolod kay Bacolod Alliance of Commuters, Operators and Drivers (BACOD) Manibela President Rudy Catedral nga ang Bacolod City ang ginhimo nga guide ni DOTr Secretary Vince Dizon agud mahibaluan ang matuod nga problema sa programa.
Sa meeting nga ginpatigayon sa DOTr National Office, yara man si Land Transportation Franchising and Regulatory Board Director Teofilo Guadiz III.
Si Catedral kag si Lilian Sembrano, presidente sang Kabakod Negros Transport Coalition Incorporated (KNETCO) Piston ang representative para sa Bacolod City samtang yara man ang Panay Piston kag Panay Manibela.
Pahayag sini nga nakibot gid si Dizon sang ginpresentar nila ang kadamuon sang mga traditional jeepneys nga nagabyahe sa ciudad nga wala sang permits, wala prangkisa kag wala insurance nga ginapahanugutan lamang sang nakaligad ni former DOTr Secretary Jaime Bautista
Halos indi makapati ang DOTr Secretary nga masobra isa ka libo pa ang mga unconsolidated traditional jeepneys nga nagarisgo sa dalanon, kag risgo man para sa mga commuters.
Nagpasalamat si Dizon nga ini ang ginpahibalo sa iya bangod wala ini sang ihibalo sa matuod nga nagakatabo sa implementasyon sang Jeepney Modernization Program.
Pahayag ni Catedral nga mahimo ginapresentar sang LTFRB nga okay lamang ang sitwasyon kag wala sang problema sa programa.
Apang sila ang nagdala sang mga ebidensya nga makapamatuod sang ila reklamo.
Sa bilog nga tion, nagapaturong lamang suno diri si Guadez kag sila ang luyag nga punggan sa paghambal apang gin-insist ni Dizon nga luyag sini mabatian ang sentimiyento sang sektor.
Nagpasalig si Dizon nga solusyonan sini ang problema sa sulod sang isa kag tunga ka semana.
Wala pa ini nagbuya sa kun ano ang tikang nga himuon, apang nagalaom si Catedral nga igrant sini ang ila panawagan sa pagreview sang programa kag mapahanugutan nga makarenew samtang nagapatigayon pa sang pagtuon, bisan tubtob lamang sa Disyembre.
Sa pihak sang paghinun-anon, gin-athag ni Catedral nga madayun ang una na nga nakachedule nga tatlo ka adlaw nga nationwide transport strike sa Marso 24 tubtob 26 ukon Lunes tubtob MIyerkules.
