Nagkomiter ang tag-iya sang bodega sang asin sa Barangay Banago, Bacolod City nga pangitaon kag irestore nila ang natampukan nga double-barrel drainage sang ciudad.
Sa interview kay Bacolod City Mayor Greg Gasataya, sa committe conference upod sa Department of Public Works and Highways (DPWH), City Engineer’s Office kag sa representative sang negosyo, natalakay ang pagpangita sa nadula nga double-barrel drainage.
Ang nasambitan nga drainage system, amo gid ang nakakonekta sa Santa Clara Avenue nga ginbaha sang nakaligad.
Madumduman nga kadungan sa kahalitan sang Hangin Habagat, madamo nga bahin sang ciudad ang ginbaha, apang ang Santa Clara Avenue amo ang pinakadugay nga nagsubside.
Magluwas sa una nga nakita nga drainage nga gamay na lamang ang exit sang tubig bangod sa pagconstruct sang bodega, ulihi na lamang namonitor nga may-ara kuntani sang double-barrel drainage nga nahamtang sa sulod mismo sang propedad.
Suno kay Mayor Greg, liwat nga magapatigayon sang conference meeting sa Agosto 17 upod na sa mga officers sang negosyo gikan sa Manila.
Apang antes paman, nagkomiter na ang mga ini nga ila obligasyon ang pagpangita kag pagrestore sa nadula nga waterways.
