Ginabanta nagdangat sa duha ka ektariya ang naapektuhan sang grass fire nga nagluntad sa nasakupan sang tatlo ka mga barangay sa ciudad sang Bacolod kahapon, Marso 14.
Ini ang sa bahin sang Barangay 2, 6 kag 8 sa ciudad sang Bacolod.
Sa interview sang Bombo Radyo Bacolod kay Fire Chief Inspector Stephen Jardeleza, Fire Marshal sang Bacolod Fire Station, pasado alas 12:00 sang udto kahapon nagluntad ang grass fire kun sa diin napuog sang aso ang downtown area.
Suno kay Jardeleza, nadugayan man sila sa pagpalong sang kalayo bangud madasig maglapad ang grass fire apang gintunguhaan nila nga indi magtabok sa dalan ang kalayo agud nga wala sang maapektuhan nga mga balay.
Ginalantaw ni Jardeleza nga mahimo dabok nga liwat nagsiga ang gintunaan sang grass fire.
Suno pa diri, daw kaangay man nga nagsunlog ang grass fire bangud bag-o lang man sila nakabutang sang tarpaulin sang 12 ka mga pahanumdom nga dapat tandaan para malikawan ang sunog sa nasambit nga lugar.
Suno kay Jardeleza, halos naman tanan nga unit sang Bacolod Fire Station ang nagresponde sa lugar agud nga magbulig sa pagpalong sang grass fire.
Magluwas sa units sang Bacolod Fire Station, ginpasalamatan ni Jardeleza ang Chamber kag Amity Volunteer Fire Brigades kag Community Fire Auxiliary Groups ukon CFAG sang barangay nga mga volunteer groups kasubong man ang presensya sang mga barangay officials nga nagbulig sa pagresponde sa grass fire.
