BACOLOD CITY-Nagpanindugan ang pinuno sang Department of Public Services sa ciudad sang Bacolod nga wala sila nagkulang sa pagpatigayon sang information campaign nahanungod sa “no segregation, no collection” policy.
Suno kay DPS head Nelson Sedillo,humalin pa sang nagligad nga tuig sang nagpatigayon sila sang information drive campaign sa publiko.
Santo sa opisyal nga flyers nga ginapanagtag sang ciudad, ang mga madunot nga basura ang dapat nga ang tagbalay ang magahimos sini, ang mga recyclable ang kuhaon ang barangay ukon ciudad kag ang residual waste ukon ang indi na gid mapuslan nga basura, ang hakuton sang IPM Construction and Development Corporation.
Samtang, ginpasalig naman ni Atty. Vicente Pettiere, secretariat sang Solid Waster Management Board nga adlaw-adlaw nila nga i-monitor ang compliance sang 12 ka mga barangay nga boluntaryo nga nagdesisyon nga mangin pilot area sang “No segregation, No collection” policy.
Suno kay Pettiere natalana man nga sapulon ang mga junk shop owners agud nga sa ila na idiretso ang mga recyclabe materials nga matipon sang mga barangay.
Madumduman nga ginpirmahan na ni Mayor Evelio Leonardia ang resolusyon nga naga-extend sang implementasyon sang “No Segregation, No Collection” policy sa Abril 1, 2020.
Nahibaluan nga ang resolusyon ang nadihon kasunod sang pagsinapol sang Liga ng mga Barangay sang Sabado kun sa diin ila ginhingyo nga i-extend anay sa Abril 1, ang implementasyon sang polisa sa baylo nga sa orihinal nga Marso 1.
